head

 

 

 

ئۆپۆزیسۆن، دەتوانێت مێژوویەكی نوێ‌ بنوسێتەوە ب. دووه م

 

 

 

مەریوان عەلی

تایبەتمەندی ئۆپۆزیسۆن

هەموو  بزوتنەوەیەكی سیاسی تایبەتمەندی خۆی هەیە، بەشێكی زۆری ئەو تایبەتەمەندیە پەیوەندی بەو فكر و ئایدیۆلۆژیایەوە هەیە كە بزوتنەوەكە هەڵگریەتی، بەشێكی تر پەیوەندی بەو بارودۆخەوە هەیە كە بزوتنەوەكەی تێدا لە دایك بووە، دروست تایبەتمەندی بزوتنەوە سیاسیەكان لە ململانێ و رووبەروبونەوەكاندا دەردەكەوێت، لەو گوتار و هەڵوێستانەدا ڕەنگدەداتەوە كە رۆژانە پێیدا تێدەپەرێت، هەرچی پەیوەندی بە بزوتنەوەی گۆڕانەوە هەیە، كەلە ساتەوەختێكی ئاڵۆز و پر كێشەی دابەشبوونی سیاسی و بەرژەوەندی و ئابوری و ناوچەییدا سەریهەڵدا، لە راستیدا ساتەوەختێكی هێجگار گران و قورس بوو بۆ سەر بزوتنەوەكە تا بەشێوەیەكی سروشتی بێتەسەر قاچی خۆی،  گۆڕان لە سەرەتای دامەزراندنیەوە تا ئێستا نەیتوانیوە لەو ململانێ و كێشانە بێتەدەرەوە كە دامەزرێنەرانی بزوتنەوەكە لە یەكێتیدا كردبویانە محورەی ململانێكان.

گۆڕان دەبێت ئەم قۆناغە تێپەرێنێت، دەبێت ململانێكان لە ماڵی یەكێتی هەڵكەنێ و بازنەیەكی گەورەتری بۆ بدۆزێتەوە، چونكە دروستبوونی هێزێكی نوێی ئۆپۆزیسۆن میراتی هێزێكی دەسەڵاتدار نییە! بۆیە گەر گۆران بەتەنیشت قەیران و كێشە و گرفتە قوڵەكانی كۆمەڵگای كوردیەوە لەدایك بووبێت، مانای ئەوە نییە ئەم بزوتنەوەیە بزوتنەوەیەكی كاتی و تێپەرە، لەگەڵا كێشەكاندا سەریهەڵداوە لەگەڵا چارەسەرەكاندا ماڵئاوایی دەكات. بەكورتی بزوتنەوەیەكی سیاسی نوێ كەلە ستراتیژدا كار بۆ سەرلەنوێ نوسینەوە و دارشتنەوەی ژیانی سیاسی و مەدەنی و دەوڵەتداری ووڵات بكات، ناكرێت لەسەر كێشەگەلێكی كاتی و تێپەر بژی!

 ئەگەرچی كاتی سەرهەڵدانی ئەم بزوتنەوەیە هاوكاتە لەگەڵا قەیرانە ناوخۆیەكانی یەكێتی نیشتمانی، بەڵام گەلێك كێشەی تر هەبوون كەلە ناوەوەڕا كۆمەڵگای كوردی ماندووكردبوو، كێشە و گرفتەكانی خزمەتگوزاری سەرەتایی هاوڵاتیان و مەسەلەی ژیانی حزبایەتی و مۆنۆپوڵكردنی سەرچاوەكانی دارایی و پاشەكشێی دیموكراسی و ئازادی لەم هەرێمەدا، فاكتەری بەهێزن بۆ سەرهەڵدانی چەندین بزوتنەوەی ناڕازی و ئوپۆزیسۆنی كارا، ئەوەی هەیە بزوتنەوەی گۆڕان تەنها لەسەر ئەم خەرمانە نەشونما ناكات، راستە ئەوانە كێشەی گەورە و قوڵی نێو كۆمەڵگای كوردیە،  كە تا ئەندازەیەكی زۆر گەلێك چەمكی وەك بەرپرسیارێتی و دیموكراسی و ڕەوایەتیی دەسەڵات لەم هەرێمەدا لە رووی ئەخلاقی و یاسایی و سیاسیەوە دەخاتەبەردەم گومان و پرسیاركردن، بەڵام ئەم كەرەستانە بەس نین بۆ سەرهەڵدانی بزوتنەوەیەكی سیاسی نوێ كە بە هیچ دەزوولەیەكی خوێنین نەچێتەوەسەر حزبەكانی پێشخۆی، ئەو توخمانە گەرچی لە كات و ساتی خۆیدا توخمی بەهێز و فیگەری گەورەن بۆ سەرهەڵدانی ناڕەزایەتیدەربرین و خۆیشاندان و ڕەخنەگرتنی دەسەڵات، هەروەك مادەی بەنرخی رۆژنامە و گۆڤارەكانن، بەڵام نابنە دواهەمین هۆكار و بزوێنەری سەرهەڵدانی بزوتنەوەیەكی سیاسی نوێ.

 بە بۆچونی من گۆڕان وەك بزوتنەوەیەكی سیاسی دەبێت لەسەر كۆمەڵێك هێڵی بەرفراوانتری سیاسی و ئابوری و كۆمەڵایەتی و فكری ئیشبكات كەمن سەرجەم ئەو هێڵانە وەك دەرفەتێكی زێرین تەماشا دەكەم بەوەی پێشتر زەمینەی ئەو خاڵانە بۆ زۆر هێزی سیاسی تر لەباربوون، بەڵام نەیانتوانیوە بەكاریبهێنن.

لە هەرێمی كوردستاندا بزوتنەوەی  گۆڕان یەكەمین ئۆپوزیسۆنی و چالاك ئیجابیە، ئەم بزوتنەوەیە كۆمەڵێك ئەركی سەرەكی لەسەر شانە:  سڵكردنەوە لە دەرئەنجامی هەڵوێست و ڕەخنە و دەرخستنی لایەنە شاراوەكانی ژیانی سیاسی ئەم هەرێمە. ئاشكراكردنی زۆرترین لایەنی پەیوەندیە سیاسیەكانی هەرێم و  ئەو ئاڵوگۆڕە سیاسی و بازرگانیانەی هەتا ئێستا لای هاووڵاتیان بە نهێنی ماونەتەوە. هەڵدانەوەی هەر لاپەرەیەكی ژیانی سیاسی لەم هەرێمەدا حەرام نەكرێت. گۆڕان دەبێت رۆڵی سەرەكی هەبێت لە رووناكیخستنەسەر هەموو ئەو بریار و یاسا و بەندە دەستوریانەی ژیانی سیاسی و ئیداری و یاسایی هەرێمی پێ رێكدەخرێت. بزوتنەوەی گۆڕان و فراكسیۆنە پەرلەمانیەكەی پێویستە پێداگری زیاتری دیموكراسی و ئازادیە گشتیەكان بێت و لەسەر هەر كێشەیەك كە پەیوەندی بە ئازادی گشتی و دیموكراسی و دادەوە هەبێت ، پێویستە دەنگێكی بەهێز و بەرز بێت، كۆی ئەم خاڵانە رزگاركردنی پرۆسەی سیاسیە لە چوار دیواری تاریك و شاراوە بۆ بەردەم رای گشتی، پێموایە بۆ گۆڕان چەمكی شەفافیەت (transparency) پێویستە وەك ستراتیژ و خوێنی نێو جەستەی بزوتنەوەكە تەماشابكرێت، هەروەك دەتوانێت ستراتیژێكی روون و ئاشكرای هەبێت دەربارەی دەسەڵات لە ناوەند و شوێنە ناكۆكەكان.

ئەم مەسەلە هەستیارانە تا ئەندازەیەك پەیوەندی ناواخنی بەستراتیژی دەسەڵاتەوە هەیە لەم هەرێمەدا، پەیوەندیان بەو قەیرانە زۆرانەوە هەیە كەلە دەرئەنجامی بریاری نائەقڵانی و كورتخایەنەوە سەرچاوەریگرتووە، لە راستیدا ئا ئەمانەیە ئەجندەی سیاسی گۆران، نەك ئەو قەیرانە ناوخۆیانەی یەكێتی كە دەرئەنجامی بەرژەوەندی تەكتل و باڵەكانی نێو یەكێتن.

ئەجندەی گۆڕان رستێك بەرپرسیارێتی و ئیلتزامی سیاسی و ئەخلاقی لەسەر ئەم بزوتنەوەیە دروستدەكات، بەجۆرێك پێویستی بە پشوو درێژیەكی زۆر هەیە تا لەگەڵا ئەم دۆخە نالەبارەی كوردستاندا، گۆڕان وەك جوڵەیەكی سیاسی نوێ هەنگاو بە هەنگاو ئەجندەكەی بخاتە بواری جێبەجێكردنەوە.

 

رێكخستنەوە و بەكارهێنانی كارتەكان

بزوتنەوەی گۆڕان دەتوانێت بەشێوەیەكی نوێ و جیاواز لە بزوتنەوە و پارتە سیاسیەكانی كوردستان خۆی رێكبخاتەوە، دیارە گرنگە بەوردی لەسەر ئەم مەسەلە هەستیارە هەڵوێستەیەك بكەین، لە پێشدا پێویستە تەفسیری دروستبوونی بزوتنەوەی گۆڕان، داببرین لە پەرچەكردار و گردبونەوەیەكی بێ رێكخستن و  منشەق لە یەكێتی، بەڵكو پێویستە بزوتنەوەی گۆڕان لەو چوارچێوە سیاسی و كۆمەڵایەتی و ئابوریەدا تەفسیربكەین، كە زەمینەی خوڵقاندن و دروستبوونی ئۆپۆزیسۆنێكی كارایە.

بزوتنەوەی گۆڕان دەیەوێت بڵێت، هێزێكی سیاسی نوێیە لە ژیانی كۆمەڵگای كوردیدا، هێزێكە مۆركی هیچ حزب و لایەنێكی تری پێوە نییە، راستە ئەم  بزوتنەوەیە پێشتر پێیەكی لە یەكێتی نیشتمانی كوردستاندا بووە و پێكەی تری لەسەر جەستە نوێیەكەی بزوتنەوەی گۆڕان، بەڵام لە ئێستادا بزوتنەوەكە تەنها لەسەر جەستەی گۆڕان (وەك بزوتنەوەیەكی سیاسی نوێ) گیرساوەتەوە.

لە راستیدا هەموو هەوڵدانێك بۆ ئەوەی گۆڕان بكاتە بزوتنەوەیەكی سیاسی نوێ، دەبێت ئەو پرسیار و فلتەرانە تێپەرێنێت كە ئەم بزوتنەوەیە بەهەر رایەڵەیەكی مەعنەوی و مێژوویی و سیاسی و ناوچەیی بە یەكێتی نیشتمانیەوە ببەستێتەوە؟ گۆڕان لەم پرسەدا پێویستی بە بڕیاری گرنگ و بەهێز و چارەنوساز هەیە، واتە گۆڕان گەر بیەوێت لە فەزای كاری یەكێتی بێتەدەرەوە و لە یەكێتی نەچێت (یەكێتیانە كاری سیاسی نەكات)، گەر بیەوێت بارگاوی نەبێت بەو ململانێ و كێشانەی یەكێتی (لە رووی ستراكچەرەوە) پێوەی دەناڵێت، ئەوا دەبێت دابرانێكی بەهێز لەنێوان خۆی و یەكێتیدا دروستبكات، دەبێت گۆڕان بەزوویی خۆی لە خۆیدا رێكبخاتەوە.

 ئەم هەڵوێستە مانای راكردن نییە لەبەرپرسیارێتی مێژوویی و خاڵیكردنەوەی ئەو مێژووەی یەكێتی كە سەركردەكانی ئێستای بزوتنەوەی گۆڕان رۆڵی كارا و سەرەكیان لە نوسینەوەی ئەو مێژووەدا هەبووە. دروست سڕینەوە و بەهەند وەرنەگرتنی مێژووی تێكۆشانی سەركردەكانی گۆران نییە لە یەكێتیدا، ، ئەو مێژووەی بۆ چەند دەیەیەكی تر یەكێتی لەسەر دەژی و لەسەر دەمێنێتەوە، یانی یەكێتی گەر لە سی ساڵی رابردوودا مێژوویەكی پرشنگداری هەبێت و كەسێك بتوانێت شانازی پێوەبكات، ئەوا بەشێكی زۆری ئەو شانازی و پرشنگدارییە بۆ ئەو سەركردانە دەگەرێتەوە كە ئێستا سەركردایەتی بزوتنەوەی گۆڕان دەكەن، ڕەنگە تاكە خۆشبەختی بۆ ئەو سەركردایەتیەی ئێستای بزوتنەوەی گۆڕان ئەوە بێت، ئەو كاتانەی یەكێتی لەبەردەم پارتی بەرەوبچوكبونەوە دەچێت، ئەو كاتانەی یەكێتی دەستبەرداری سەرەتایترین پرنسیپەكانی دروستبوونی خۆی دەبێت، ئەوكاتەی یەكێتی دەكەوێتە سەرئەژنۆ بۆ گروپێك كە لەناوەوە یەكێتیان كۆنترۆڵكرووە، ئەو كاتەی برێكی زۆر ڕای جیاوازی و ئازادی و ژیانی حزبایەتی لەم حزبەدا دەپوكێتەوە، ئەو كاتەی یەكێتی لە رێكخراوێكی سیاسی نوێوە كە شوێنی ئومێدی نەوەی دوای حەفتاكان بووە، ئێستا بەرەو كۆمپانیای زەبەلاحی ئابوری  هەنگاو دەنێ، ئەو كاتانە دەمێك بوو سەركردەكانی ئێستای بزوتنەوەی گۆڕان ماڵئاواییان لە یەكێتی كردبوو و یەكێتیان بۆ خاوەنەكانیان بەجێ هێشتبوو!

 

پەیكەری بزوتنەوەكە و ستراتیژ

بۆ بزوتنەوەی گۆران ئەوە گرنگ نییە لەشكرێك ئەندام و موچەخۆری هەبێت، ئەوە گرنگ نییە چەند كەس لە شانە و رایەڵە حزبیەكەیدا رێكدەخرێت، ئەوەی گرنگە خاوەن پەیكەرێكی رێكخراوەیی نوێ بێت كە بەهیچ كۆلاج و رایەڵەیەك نەچێتەوە سەر حزبەكانی تر، ئەوە گرنگە بەرنامەی هەڵبژاردنی(انتخابات) بەهێز و ئەقڵانی و لۆژیكی هەبێت، راستیەكەی ئەوە مانای ئەوە نییە كە دەبێت بزوتنەوەی گۆڕان پێكهاتەیەك بێت لە هیچ پێكهاتە و حزبێكی تر نەچێت، یانی لە بۆشاییەوە بێت و هیچ نمونەیەكی نەبێت، بەپێچەوانەوە سەرجەم حزبەكانی دونیا چەندین خاڵی هاوبەشیان هەیە، بەڵام خاڵە جیاوازەكانیشان دەبێتە خاڵی جیاكاری و جیاوازی نێوانیان، ئەوەی من مەبەستمە بیڵێم ئەوەیە، دەبێت لە پەیكەری رێكخراوەیی بزوتنەوەی گۆڕاندا ستراتیژ و بەرنامە و ئەجندەی بزوتنەوەكە لەسەر بنەمای ئەقڵانی و لۆژیكی و دیموكراسیانە بینابكرێت ، نەك شێوازی هەرەمی بزوتنەوەكە ببێتە كێشەی دامەزراندن، هەروەها چۆنیەتی دروستكردنی بریار و كۆدەنگی هەڵوێست و نەهێشتنی تاكڕەویی لە پرسە چارەنوسازەكاندا گرنگی پێبدرێت، نەك چۆنیەتی دابەشكردنەوەی بەرپرسیارێیتەكان، ئەمە مانای ئەوە نییە كە سەركردایەتیكردن و دابەشكردنەوەی بەرپرسیارێتیەكانی نێو بزوتنەوەكە گرنگ نییە، یان بایەخێكی لاوەكی هەیە، بەپێچەوانەوە دەبێت سەركردایەتی و رایەڵ و بەرپرسیارێتیەكانی نێو بزوتنەوەكە لەسەر بنچینەی دیموكراسی و ئەخلاقیاتی ئەرك و بەرپرسیارێتی نێو بزوتنەوەكە دابمەزرێت، واتە ئەرك و ستراتیژ و ئەجندای بزوتنەوەكە هەروەها سەركردایەتی و پەیكەری رێكخراوەكە، دەبێت پابەندی رێزگرتن زۆرینە و بنەمای ئەقڵانی بێت.

 ئێمە ئەزموونی ئیش دۆزینەوەی نێو حزبەكانی ترمان بینی، ئەزمونی سوڵتانی ڕەهای نێو دامەزراوە و دەزگا حزبیەكانی ترمان بینی، ئەزموونی تاكڕەوی و گوێنەگرتن لەكەسمان بینی، دەبێت بزوتنەوەی گۆڕان ئەو ئەزموونە تێپەرێنێت، باشترین خاڵی دەستپێك بۆ ئەو تێپەراندنە، بەكارهێنانی ئەقڵە لە نێو هەناوی بزوتنەوەكەدا، راڤەكاری ژیانی دیموكراسی نێو بزوتنەوەكەیە، هەروەك تاپۆنەكردنی پۆستەكانە لەسەر كەسەكان، یانی كەسێك كە بووە بەرپرسی ئۆرگان و دامەزراوەیەك  ئیدی پۆستەكە بە باڵا و خواستی ئەو نەبڕێت، مەرجی لاچونیشی لەو پۆستە دۆزینەوەی پۆستێكی تر بێت، راستیەكەی ئەم ئەزموونە بەشێكی زۆری حزبەكانی كوردستانی گرتۆتەوە، تەنانەت ئەم پەتایە نقڵا بووە بۆ نێو دامەزراوە حكومیەكانیش، بەوەی حكومەت زیاتر لە دەزگایەكی حزبی دەچێت تا ئەوەی دەزگایەكی ئیداری و فەرمانڕەوایەتیكردن بێت.

لە تەماشاكردنی پەیكەر و ستراتیژی بزوتنەوەی گۆڕاندا، گرنگی بەوە نادەین شانە حزبیەكانی ئەم بزوتنەوەیە چۆن رێكدەخرێن؟ ئەرك و بەرپرسیاری كادر و لایەنگرانی ئەم بزوتنەوەیە چین! هەروەها باسی ئەوە ناكەین چۆن ریزبەندی نێو پەیكەرە دادەرێژرێت، تەنانەت گرنگی بەوەشنادەین داخۆ پەیكەری بزوتنەوەكە لەشار و شارۆچكە و گوندەكاندا چۆن رێكدەخرێت؟ ڕەنگە ئەوەش بەلامەوە گرنگ نەبێت رایەڵەی پەیوەندییە ئۆرگانیەكانی نێو ئەو پەیكەرە چۆن پێكەوە دەبەسترێنەوە؟ هەروەك سەرنجیش لەوە نادەین پۆلێنبەندی نێو پەیكەرەكە لەسەر چ بنەمایەك دەبێت؟ تەنانەت سەرنج لەوەش نادەین ئەم بزوتنەوە نوێیە چۆن لەو ناوچانە كاردەكات كە ناوچەی نفوزی ئەو نین؟ ڕەنگە ئەوەش زۆر كێشە نەبێت داخۆ پەیكەری بزوتنەوەكە پەیكەرێكی توندوتۆڵە یان لاواز؟ واتە كەسێك دەتوانێت سنورەكانی ئەم پەیكەرە ببرێت و نهێنیەكانی ناوی كەشفبكات یان نا؟ ئەوەی بەلای منەوە گرنگە مەنهەجی ئیشكردنی سیاسیانەی نێو پەیكەرەكەیە! فەزای بەشداری سیاسی و رێزگرتنی بۆچونی جیاواز و ژیانی دیموكراسیانەی نێو بزوتنەوەكەیە، هەروەك هاتنە دەنگی بزوتنەوەكەیە لەسەر ئەو مەسەلانەی پەیوەندی بە دادپەروەری و یەكسانی و ئازادییە گشتیەكانەوە هەیە بەچەشنێك گوێ نەداتە ئەوەی چ زیانێكی مادی و جەستەی لەسەر بزوتنەوەكە دروست دەكات، ئەوەی گرنگە ئەم بزوتنەوەیە تا چەند سەرسەختانە داكۆكی لە مافی هاوڵاتیان دەكات، چەند اعتبار بۆ رۆڵی تاك دەگێرێتەوە، چەندە كاردەكات بۆ ئەوەی ئینتمای نیشتمانی و هاوڵاتی بوون لەسەر بنەمای ئینتمای ئینسانیبوون دابمەزرێنێتەوە.

 ئایا پەیكەری رێكخراوەیی بزوتنەوەی گۆڕان، لەو چوارچێوەیەی ئاماژەمان پێدا دەبێتە دەستپێك بۆ نوسینەوەی مێژوویەكی سیاسی نوێ لەم هەرێمەی ئێمەدا؟ ئایا ئەم پەیكەرە رێكخراوەییە دەتوانێت مۆدیلێكی نوێی حزبایەتی بخوڵقێنێت؟

ئەوەی بەلای منەوە گرنگ سێ توخمی سەرەكییە كە پێویستە لە پەیكەری رێكخراوەیی بزوتنەوەی گۆڕاندا هەبێت، دیموكراسی لە بریارداندا، شەفافیەت لە جێبەجێكردندا، بەپرسیارێتی ئەخلاقی لە ئیلتزمدا.

 

 

 

 

 

سەرچاوەكان

1.         بيتر بروكرعبد........ الحداثة و مابعد الحداثة.....ترجمة د. الوهاب علوب، مراجعة جابر صفور، منشورات المجتمع الثقافي الطبعة الَاولي 1995، ص 79.

2.         محمد علي الكبسيي........... ميشال فوكو، تكنولوجيا الخطاب، تكنولوجيا السلطة، تكنولوجيا السيطرة علي الجسد، سيراس للنشر 1993

3.         http://critique-sociale.blogspot.com/2008/05/blog-post.html

4.         مايكل هارت و أنطونيو نيغري، أمبراطورية العولمة الجديدة.... ترجمة فاضل جتكر.....الناشر العبيكان مع هارفارد يونيفرستي ثرس 2002.

5.         ألان تورين ...ماهي الديموقراطية؟ حكم الَاكثرية أم ضمانات الَاقلية....ترجمة حسن قبيسيي..النشار دار الساقي، الطبعة الَاولي 1995، ص 17

6.         محمد الشيخ..... المثقف و السلطة، دراسة في الفكر الفلسفي الفرنسي المعاصر..الناشر دار الطليعة، بيروت الطبعة الَاولي1991 ، ص25

7.         جيوفري نويل و كينتين هور......غرامشي و قضايا المجتمع المعاصر....تلاجمة فاضل جتكر، الناشر مركز البحوث العربية.، الطبعة الَاولي 1991، ص 116.

8.         رودني أ. سموللا.... حرية التعبر في المجتمع مفتوح......ترجمة كمال عبدالرؤوف...الناشر...الجمعية المصرية لنشر المعرفة و الثقافة العالمية، 1995، ص109.

9.         فاروق رفیق............ ماڵێكی لێك ترازاو و ویژدانێكی بیمار...ساڵی چاپ 2002چاپی یەكەم.

 

 
رۆشنگەری
وتار‌و بۆچوون

وڕێنەی نەدیایەم باوکت، ئەمردم وە حەسرەت دایکت

سەعید کاکەیی

كۆمەڵگای داخراو، كاوە گەرمیانی وەك دەرفەتێك بۆ روانین

مەریوان عەلی

سەرۆك نەخۆشە! بەڵام رەخنەكان وەك خۆیان ماون

هەردی عەلی

بزوتنه‌وه‌ی گۆڕان؛ له‌نێوان یۆتۆپیاو ئایدۆلۆجیادا...

ئاسۆ ئه‌مین

سێ شت به‌ پێوه‌رێكی دی.. رۆڵی پارتی

سه‌وسه‌ن هیرانی

ڕەشنووسی دەستوور و دانوستاندنی هەمەلایەنی ڕیزبەندانە

سەعید کاکەیی

له‌ په‌راوێزی كاندیدكردنه‌وه‌ی سه‌رۆك، رایه‌كی جیاواز

مه‌ریوان عه‌لی

ئیسلامیزه‌كردن، فۆبیا‌و كاردانه‌وه‌

سه‌لام مارف

شۆڕشی داهاتوو، شۆڕشی دابه‌شكردنه‌وه‌ی سامان ده‌بێت

سه‌لام مارف

بودجه‌ له‌نێوان ژیانێكی دادپه‌روه‌رانه‌و ناوێكی خوازراو بۆ به‌ سستماتیكه‌كردنی نادادپه‌روه‌ری

بێستون محمو‌د

 
رؤشنطةرى

C 2010 All right reserved, roshngari.com